Donnerstag, 11. April 2013

IDAHO :D here I come *__*

Heioo :D

Ich meld mich au mal wieder:)  Wie de Titel scho seit: Ich wird mis Ustuschjahr in Idaho verbringe*__*
Ich han am 9. April erfahre, dass e Gastfamilie für mich gfunde worde isch :D wuhuu! Nur leider hends  ned mir aglüte sondern mim Mami. Ja und sie het leider sHandy ned chöne abnäh, wil sie e sizig gha het:( Aber grad wo sie ufem Heiweg gsi isch het si mer aglüte. Und ich bin so gnervt gsi, dass sie jetzt alütet will ich so kaputt gsi bin vom ganze Tag. Und denn het sie mir aber gseit, dass e Gastfamilie für mich gfunde worde isch. Und ich bin so ufgregt gsi und hans ihre zerscht mal 10 min ned glaubt, bis ich denn wüki voll usgflippt bin vor Freud. Ich bin so glücklich gsi und plötzlich wieder top fit. ;)
Nur hets jetzt no eis Problem gä. Sie hend ned gseit wo ich anechume oder wie dFamilie usgset.:/ Und sTelefon im Büro hends au nüm abgno, wills scho zspat gsi isch. Also hanich mal wieder müsse warte. DNacht isch soooo langsam verbi gange, aber schlussendlich isch denn doch no morge worde :) 
Am halbi 9i hani EF aglüte und grad nach me Infos gfragt. Sie het mer gseit das ich uf Idaho chume :D yeey :D über dGastfamilie wüsseds leider au nanig so viel. Aber nechscht Wuche schickts mir all Informatione damit ich mit de Familie chan Kontakt ufnä! 
Ich freu mich soooo fescht und bin überglücklich. Evt wohnt sogar no en andere Ustuschschüeler i dere Familie. Aber das münds alles no abkläre :D
Jaa das wärs au scho wieder gsi:P 

Witeri Infos folget natürli wieder :D
IDAHO <3 isch zwar chli nördlicher als ich erwartet han aber ich finds super. Und wer weiss, viellicht gang ich mit minere Gastfamilie sogar mal nach Kanada...?! :D



Mittwoch, 13. März 2013

Allergietest

Jaaaa... :P Ich bin ja am Mäntig bim Arzt gsi und han welle de Allergietest mache wohni mal erwähnt han. Aber wonich denn det gsi bin und em Arzt die Formular zeigt han, het er gseit, dass er kein Test mache chan, er heigi nur mini alte Ergebnis vo dem Test wonich früener mal gmacht han. Das hanich licht komisch gfunde und denn het er halt eifach das Formular usgüllt ahand das er mich gefragt het ob mir eppis uffallt wenn ich zb ide nöchi vo Hünd oder Pferd bin. Denn hani gseit ich weisses ned, will ich ned viel mit Hünd oder Pferd oder suscht irgendwelche Tier ztue han. Ja und denn het er eifach gseit ich sig ned allergisch. Hmm und ja... Das isch denn de Arzttermin gsi. Ich han mich nacher ziemlich ufgregt, will genau soviel wie de akrüzlet het, het ich oder mis Mami genau au chene selber achrüzle-.- Aber egal. Ich han ihn denn au no gefragt ob er mir das Formular echt no schnell chent iscanne, und denn seit er eifach nei :o Ich han nur so denkt: aha okei, danke?! Das het mich denn no meh ufgregt will churz vor em Termin het mir eini vo EF aglüte und gefragt ob ichs Formular echt no chent am gliche Tag schicke, was ich denn aber ned han chene mache:/
Mis Mami hetz denn aber grad am nächste Tag ide Schuel igscannt und het au mit dene vo EF telefoniert und ihne gseit, dass de Termin bim Arzt ned wüki eppis bracht het. 
Aber jetzt isch mir das alles voll egal. Sie sind jetzt nämlich definitiv am Familie sueche und ich bin no ufgregter als vorher will vorher hends nonig richtig gsuecht, glaubs??! :P haha und mega viel säget, dass es mega schnell gat nachdem mer alles abgäh het :D
Ich hoffe ich weiss bald bscheid:D 

Schöne Abig no 
AnnA:)

Montag, 11. März 2013

Zrug vo London und schowieder Schuel!

Hei zäme :)
So nachdem mir am Sunntig Abig vo London zrugg cho sind, het jetzt leider dSchuel scho wieder agfange. Es het sich so abfühlt als wär ich e Wuche die Ferie gsi:)
Londo isch soooooo hammer. Ich lieb die Stadt!! Ich wünschti ich wür det wohne und chönt täglich mit dene rote büs umefahre und mit de tube :D Es isch eifach einzigartig gsi! Mir hend i dene 2 Täg so unglaublich viel vo dere Stadt gse. Und mir hend au chöne vo obe uf sie abeluege, will mir ufs London Eye gange sind *__* Natürlich simer au go shoppe :P Ide Oxford Street <3 die Strass isch eifach 3x so lang wied Bahnhofsstrass in Zürn. Also ich und Kristina sind scho recht lang unterwegs gsi, und hend au eusi Problem gha sHotel wieder zfinde. Aber de Usflug sich eifach genial gsi :D
Ja leider het dSchuel scho wieder agfange und de normali Alltag gat witer (was mengisch sehr langweilig si chan!)  Naja egal!

Da sind no es paar fotis vo London! es sind lang ned alli, aber es paar wo mir gfallet und ich eu gern zeige wür ;)

Das isch so es typisch Englischs Taxi. Die sind so herzig und cool:) Im Hintergrund gset mer die geilste Büs uf Erde :P

Kristina und ich vorem shoppe :D

Wieso hemer kei settig Telefonkabine ide Schwiz??? :(

Londo Eye *__*

Ussicht vom London Eye uf de Big Ben :D


Shopping *_*

Buckingham Palast


Starbucks :D

Donnerstag, 7. März 2013

going to LONDON :D

hi ho :D

Es git zwar leider no nüt neus über Amerika, ABER: ich flüg morn abig uf London!!! :D Wuhuu 
Es isch so luschtig gsi wie sich das ereignet het. Voll spontan haha...;) Naja.
Ich gang mit mim Mami, em Thommy und de Kristina:) ich freu mich sooo mega fescht. Ebe morn abig flüge mer und denn luege mer dStadt ah, fahret mit dene rote Büs *_* und natürlich gömer au go shoppe :D Das wird so genial!
Ja und denn chunt au no dezue, dass ich seehr bald Geburtstag han! Und uf de freui mi au scho gigantisch!

Am Mäntig chanich denn endlich de Allergietest mache. Und denn hoff ich, dass ich bald e Gastfamilie han. Völlig egal wo! Ich weiss es wird es hammer Jahr :D 

Ich meld mich nach London wider ;) 

gnüssed de Abig no :P

grüessli AnnA
 

Dienstag, 26. Februar 2013

Immer no nix

Hei zäme ;)

Leider hanich immer no nüt vo EF ghört. Naja sind ja au erscht 2 Täg verbi sit em letschte bzw. 1 Post. Mir chunts aber so vor wie e Eeeeeeewigkeit :o. Ich will endlich wüsse wo ich, mis hoffentlich hammer Jahr verbringe döf.
Mit jedem Tag binich ufgregter und ufgregter. Ide Facebook- Gruppe wo all Ustuschschüeler vo EF drin sind wo im Summer uf Amerika gönd, schribets immer "omg I just got my hostfamily, I'm going to ...". Ich will das au endlich chöne anschribe:( Aber ich hoffe doch das Glück hanich bald. :)
Usserdem muss ich dene Lüt eh no en Allergietest schicke. De Test chanich leider erscht am 11. März mache, will de Arzt kein früenere Termin frei gha het und ich muss es vo mim Hausarzt mache la. Also wird ich sowieso kei Familie bis denn übercho. Aber ich glaub sie sind trotzdem scho chli am umeluege :)) Uf jede fall isch mis Dossier mit minere Bewerbig und so scho in Amerika:D  Ebe, wie gseit: jetzt musich no de Allergitest mache und denn chani nur no warte...( Ich hasse warte!!)

Ich meld mich sobald ich wieder Neuigkeite han und hoffe dass das sehr bald sie wird :P

Machets guet :*
xoxo

Sonntag, 24. Februar 2013

Hallööö :D

Hallo zäme,
Ich han mich dezue entschide en Blog zmache. Ich wird im Summer für 1 Jahr uf Amerika flüge und det binere Gastfamilie wohne. De Blog isch vorallem für mini Familie und Fründe denkt, damit ihr gsend was ich grad so mach uf de andere site vode Welt ;)!  Ich denk au das ich froh bin wenn ich nach dem Jahr immer mal wieder chan Erinnerige lese und zrugg a die Zit chan denke. Aber sowit isches ja nonig. :) 

Vor öppe 3 Mönet han ich agfange mich bi EF zbewerbe und das au erfolgrich. Mitlerwile bin ich scho voll im Programm und warte jede Tag uf en Brief oder es Telefon vo ihne wo sie mir säget wo und vor allem bi wem ich das Jahr verbringe döf. Ich bin scho so ufgregt:D

Wie ich mich dezue entschiede han überhaupt es Jahr vo dihäi wäg zga isch e relativ gueti Frag :P Ich glaub wo e Fründin vo mir gseit het sie gat es Jahr uf Panama go Spanisch lerne, hanich mir das serscht mal überleit. Und denn isch au no d'Laura us minere ehemalige Klass im letschte Summer uf Argentinien gfloge. Sit denn binich immer wieder chli go Videos aluege uf Youtube und bin mega begeisterte gsi. Ja und denn hanich das mit mim Mami besproche. Ich glaub am Anfang het sie gar ned tscheggt das ich würkli es Jahr weg ga will und drum isch sie au immer voll locker mit dere ganze Situation umgange. Wo sie denn gemerkt het, dass ichs würkli ernst mein, het sie glaub scho es paar zwifel übercho. :P Aber sie unterstützt mich immer! und ich bin ihre sooo mega fescht dankbar das sie mir das Jahr ermöglicht :D :* 
Ich weiss scho jetzt, dass es ned eifach wird, will ich wird s'Mami und Kristina sicher jede Tag vermisse. Aber ich bin ja ned für immer weg und ich weiss ihr chömed mich mal go bsueche und uf das freu ich mich scho jetzt. Viellicht isch ja sogar de Thommy denn Pilot und ich chan eu denn mit em Auto vom Flughafe abhole :P Weisch wie luschtig ;)) Und es git ja au no Skype. 

Ja also das wärs au scho gsi. Ich hoffe ihr lueget denn ab em summer mal verbi:)
Und ja, ich gnüss die Zit ide Schwiz no bis es denn endlich losgat ;) 

xoxo AnnA